ಬೆಂಗಳೂರು: ಕರ್ನಾಟಕ ರಾಜ್ಯ ಕಾಯರ್ ಕೋ ಆಪರೇಟಿವ್ ಫೆಡರೇಷನ್ ಮತ್ತು ಸನ್ ಎಂಟರ್ ಪ್ರೈಸ್ ನ ಸಹಯೋಗದಲ್ಲಿ ಬೆಂಗಳೂರು ಹಬ್ಬ 2018 ಕರಕುಶಲ ವಸ್ತುಗಳ ಮಾರಾಟ ಮತ್ತು ಪ್ರದರ್ಶನ ಮೇಳ ನಡೆಯುತ್ತಿದೆ. ಬೆಂಗಳೂರಿನ ಕೋರಮಂಗಲ ಮೈದಾನದಲ್ಲಿ ನವೆಂಬರ್ 2ರಿಂದ ನವೆಂಬರ್ 4ರವರೆಗೆ ನಡೆಯಲಿರುವ ಈ ಬೆಂಗಳೂರು ಹಬ್ಬವನ್ನು ಚಲನ ಚಿತ್ರ ನಟಿ ದೀಪಿಕಾ ದಾಸ್ ಅವರು ಉದ್ಘಾಟಿಸಿದ್ರು. ಉದ್ಘಾಟನಾ ಕಾರ್ಯಕ್ರಮದಲ್ಲಿ ವಿನಯ್ ರಾಘವೇಂದ್ರ ರಾಜ್ಕುಮಾರ್ ನಟಿಸಿರುವ ಅನಂತು ವರ್ಸಸ್ ನುಸ್ರತ್ ಚಿತ್ರ ತಂಡ ಮತ್ತು ಡಾಟರ್ ಆಫ್ ಪಾರ್ವತಮ್ಮ ಚಿತ್ರ ತಂಡದ ಕಲಾವಿದರು ಉಪಸ್ಥಿತರಿದ್ದರು.
ಬೆಂಗಳೂರು ಹಬ್ಬವನ್ನು ಉದ್ಘಾಟಿಸಿ ಮಾತನಾಡಿದ ದೀಪಿಕಾ ದಾಸ್, ನವೆಂಬರ್ ತಿಂಗಳು ಅಂದ್ರೆ ಪ್ರತಿಯೊಬ್ಬ ಕನ್ನಡಿಗರಿಗೂ ಸಂತಸ ಸಡಗರದ ತಿಂಗಳು. ಕನ್ನಡ ಭಾಷೆಯನ್ನು ಪ್ರತಿಯೊಬ್ಬರು ಪ್ರೀತಿಸಬೇಕು. ಹಾಗಂತ ಬೇರೆ ಭಾಷೆಯನ್ನು ದ್ವೇಷ ಮಾಡಬಾರದು ಅಂತಲ್ಲ. ಅನ್ಯ ಭಾಷಿಗರಿಗೂ ಕನ್ನಡ ಭಾಷೆಯನ್ನು ಕಲಿಸಿ ಕನ್ನಡ ಭಾಷೆಯನ್ನು ಬೆಳೆಸೋಣ ಎಂದು ಹೇಳಿದ್ರು.
ದೀಪಾವಳಿ ಹಬ್ಬದ ವೇಳೆ ನಿಮ್ಮ ಮನೆಯನ್ನು ಶೃಂಗಾರಗೊಳಿಸಲು ಮನೆಸೂರೆಗೊಳಿಸುವಂತಹ ಆಲಂಕಾರಿಕ ವಸ್ತುಗಳನ್ನು ಬೆಂಗಳೂರು ಹಬ್ಬ 2018ರ ಪ್ರದರ್ಶನ ಮತ್ತು ಮಾರಾಟ ಮೇಳದಲ್ಲಿ ಇಡಲಾಗಿದೆ. ಕರ್ನಾಟಕ ಕಾಯರ್ ಕೋ ಆಪರೇಟಿವ್ ಫೆಡರೇಷನ್ನ ಉತ್ಪನ್ನಗಳ ಜೊತೆಗೆ ದೇಶದ ವಿವಿಧ ರಾಜ್ಯದ ಜನಪದ, ಸಂಸ್ಕøತಿ ಹಾಗೂ ಕಲೆಗಳನ್ನು ಪ್ರತಿಬಿಂಬಿಸುವ ಚಿತ್ರಕಲೆಗಳ ಮಾರಾಟ ಮಳಿಗೆಗಳಿವೆ. ಅಲ್ಲದೆ ಅತ್ಯಾಕರ್ಷಕವಾದ ಕರ ಕುಶಲ ವಸ್ತುಗಳು, ಕೈಮಗ್ಗದ ಉತ್ಪನ್ನಗಳು, ಹ್ಯಾಂಡ್ಲೂಮ್ ಬಟ್ಟೆಗಳು ಸೇರಿದಂತೆ ವೈವಿಧ್ಯಮಯ ಕರಕುಶಲ ವಸ್ತುಗಳು ಬೆಂಗಳೂರು ಹಬ್ಬಕ್ಕೆ ಮೆರಗನ್ನು ನೀಡಲಿವೆ.
ಹಲವು ವಿನ್ಯಾಸದ ಸೀರೆಗಳು, ಸಿಲ್ಕ್ ಸೀರೆಗಳು, ಕಲಾಂಕಾರಿ ಸೀರೆಗಳು, ಕೊಲ್ಕತ್ತಾ ಸೀರೆಗಳು, ಹುಬ್ಬಳ್ಳಿ ಸೀರೆಗಳು, ಹ್ಯಾಂಡ್ ಲೂಮ್ ಸೀರೆಗಳು ಮಹಿಳೆಯರನ್ನು ಆಕರ್ಷಿಸಿದ್ರೆ, ಡಿಸೈನರ್ ಕುರ್ತಾಗಳು, ಲಕ್ನಾವಿ ಕುರ್ತಾಗಳು, ಕಲಾಂಕಾರಿ ಕುರ್ತಾಗಳು, ಕಾಶ್ಮೀರಿ ಕುರ್ತಾಗಳು, ಗುಜರಾತಿ ಕುರ್ತಾಗಳು, ಬಾಂಧಾನಿ ಕುರ್ತಾಗಳು ಮತ್ತು ಖಾದಿ ಕುರ್ತಾಗಳು, ಬಗೆ ಬಗೆಯ ದುಪ್ಪಟಗಳು ತರುಣಿಯರ ಅಂದವನ್ನು ಹೆಚ್ಚಿಸಲಿವೆ.
ವಿವಿಧ ರಾಜ್ಯಗಳ ಜ್ಯುವೆಲರಿಗಳ ಜೊತೆಗೆ ಸಿಲ್ವರ್ ಜರ್ಮನ್ ಜ್ಯುವೆಲರಿಗಳು, ಮರದ ಆಭರಣಗಳು, ಟ್ರೆಂಡಿ ಆಭರಣಗಳು, ಕರಕುಶಲತೆಯ ಜ್ಯುವೆಲರಿಗಳು ಹಾಗೂ ಸಾಂಪ್ರದಾಯಿಕ ಜ್ಯುವೆಲರಿಗಳು ಸೂಜಿಗಲ್ಲಿನಂತೆ ಆಕರ್ಷಿಸಲಿವೆ. ಅಷ್ಟೇ ಅಲ್ಲ, ಈ ಹಬ್ಬದಲ್ಲಿ ವಿವಿಧ ರಾಜ್ಯಗಳ ಸಿಹಿ ತಿಂಡಿ ತಿನಸುಗಳೂ ಇವೆ. ಹಾಗೇ ಶುಚಿ ರುಚಿಯ ಫುಡ್ ಸ್ಟಾಲ್ಗಳು ಕೂಡ ಗ್ರಾಹಕರ ಹೊಟ್ಟೆ ತುಂಬಿಸಲಿವೆ.
