ಬೆಂಗಳೂರು: ಇತ್ತಿಚೇಗೆ ಸೆಲ್ಫಿ ವಿಡಿಯೋ ಮಾಡಿ ಆತ್ಮಹತ್ಯೆಗೆ ಶರಣಾಗೋ ಪ್ರಕರಣಗಳು ಹೆಚ್ಚಾಗ್ತಿವೆ. ಇಂದು ಪ್ರಿಯಕರನಿಂದ ವಂಚನೆಗೆ ಒಳಗಾದ ಕಿರುತೆರೆ ನಟಿಯೊಬ್ಬರು ವಿಷ ಸೇವನೆಯ ಸೆಲ್ಫಿ ವಿಡಿಯೋ ಮಾಡಿ ಆತ್ಮಹತ್ಯೆಗೆ ಶರಣಾಗಿರೋ ಆಘಾತಕಾರಿ ಘಟನೆ ನಡೆದಿದೆ.
ಕಿರುತೆರೆ, ಸಿನಿಮಾ ಹಾಗೂ ಕೆಲವು ಜಾಹೀರಾತುಗಳಲ್ಲಿ ನಟಿಸಿದ್ದ ಹಾಸನ ಜಿಲ್ಲೆಯ ಬೇಲೂರು ಮೂಲದ ನಟಿ ಚಂದನ(29) ಸೆಲ್ಫಿ ವಿಡಿಯೋ ಮಾಡಿ ಆತ್ಮಹತ್ಯೆಗೆ ಶರಣಾಗಿದ್ದಾರೆ. ಮೇ.28 ರಂದು ನಡೆದಿರೋ ಘಟನೆ ತಡವಾಗಿ ಬೆಳಕಿಗೆ ಬಂದಿದೆ. ಚಂದನ ಕಳೆದ 5 ವರ್ಷಗಳಿಂದ ದಿನೇಶ್ ಎಂಬುವವರನ್ನ ಪ್ರಿತಿಸುತ್ತಿದ್ದರು. ಆದ್ರೆ, ದಿನೇಶ್ ಮದುವೆಯಾಗುವುದಾಗಿ ನನ್ನನ್ನು ನಂಬಿಸಿ ಮೋಸ ಮಾಡಿದ್ದಾರೆ. ಅಲ್ಲದೆ ಹಲವು ಭಾರೀ ನನ್ನಿಂದ ಹಣ ಪಡೆದು ವಂಚಿಸಿದ್ದಾರೆ ಅಂತಾ ಸೆಲ್ಫಿ ವಿಡಿಯೋದಲ್ಲಿ ಆರೋಪಿಸಿದ್ದಾರೆ.
ಯಾರ ಜೀವನದಲ್ಲಿಯೂ ಆಟವಾಡಬೇಡಿ, ನಾನು ಇಷ್ಟು ದಿನ ಏನೇ ಮಾಡಿದ್ರು ನಿಮ್ಮನ್ನು ಮದುವೆ ಆಗ್ಬೇಕು ಅಂತಾನೇ ಮಾಡಿದ್ದೇನೆ ಹೊರತು ಬೇರೆನೂ ಅಲ್ಲ ಅಂತಾ ಅಳುತ್ತಲೇ ಸೆಲ್ಫಿ ವಿಡಿಯೋ ಮಾಡಿದ್ದಾರೆ. ಅಳುತ್ತಲೇ ವಿಷ ಕುಡಿದು, ಇಷ್ಟು ವಿಷ ಕುಡಿದಿದ್ದೇನೆ ನಾನು ಸಾಯಲು ಇಷ್ಟು ಸಾಕು ಎನಿಸುತ್ತದೆ. ನೀವು ಖುಷಿಯಾಗಿರಿ ಅಂತಾ ವಿಡಿಯೋದಲ್ಲಿ ಹೇಳಿದ್ದಾರೆ. ಇನ್ನೂ ಚಂದನ ವಿಷ ಕುಡಿದ ವಿಚಾರ ಪ್ರಿಯಕರನಿಗೆ ಗೊತ್ತಾಗಿದೆ. ಆತನೇ ಚಂದನಳಾನ್ನ ಆಸ್ಪತ್ರೆಗೆ ಸೇರಿಸಿದ್ದಾನೆ. ಆದ್ರೆ ಚಿಕಿತ್ಸೆ ಫಲಕಾರಿಯಾಗದೆ ಚಂದನ ಸಾವನ್ನಪ್ಪಿದ್ದಾರೆ. ಸಾವಿನ ಸುದ್ದಿ ತಿಳಿಯುತ್ತಿದ್ದಂತೆ ದಿನೇಶ್ ಎಸ್ಕೇಪ್ ಆಗಿದ್ದಾನೆ ಎನ್ನಲಾಗಿದೆ.
