ಬಗೆಬಗೆ ವಿನ್ಯಾಸದ ಆಭರಣಗಳನ್ನು ಕೊಳ್ಳುವುದಷ್ಟೇ ಮುಖ್ಯವಲ್ಲ. ಅವುಗಳನ್ನು ಜಾಗ್ರತೆಯಿಂದ ಕಾಪಾಡಿಕೊಳ್ಳುವುದು ಕೂಡ ಅಷ್ಟೇ ಮುಖ್ಯ. ಆಭರಣಗಳನ್ನು ಸೂಕ್ತ ನಿರ್ವಹಣೆ ಮಾಡದಿದ್ದರೆ ಅವು ಹಾಳಾಗುತ್ತವೆ ಮತ್ತು ಅವುಗಳ ವಿನ್ಯಾಸಕ್ಕೆ ಧಕ್ಕೆಯಾಗುತ್ತದೆ. ಎಲ್ಲೆಂದರಲ್ಲಿ ಇರಿಸುವುದರಿಂದ ಅವುಗಳ ಹೊಳಪು ಮಾಸುವುದರ ಜೊತೆಗೆ ಅವು ಕಾಂತಿ ಹೀನವಾಗುತ್ತವೆ.
ಆಭರಣಗಳ ಸುರಕ್ಷತೆ ಜೊತೆಗೆ ಅವುಗಳು ಹಾಳಾಗದಂತೆ ನೋಡಿಕೊಳ್ಳುವುದು ಮುಖ್ಯ. ಲಾಕರ್ನಲ್ಲಿಟ್ಟಾಗ ಅದರೊಳಗೆ ಆಭರಣಗಳಿಗೆ ಯಾವುದೇ ಧಕ್ಕೆಯಾಗುವುದಿಲ್ಲವೇ ಎಂಬುದನ್ನು ನೋಡಿಕೊಳ್ಳಬೇಕು. ಇತರೇ ಕೃತಕ ಆಭರಣಗಳು ಇಲ್ಲವೇ ಗೋಲ್ಡ್ ಕೋಟೆಡ್ ಆಭರಣಗಳ ಜತೆಗೆ ಯಾವುದೇ ಬಂಗಾರದ ಹಾಗೂ ಮುತ್ತಿನ ಆಭರಣಗಳನ್ನು ಇರಿಸಕೂಡದು. ಒಂದಕ್ಕೊಂದು ತಿಕ್ಕಿ ಕಲೆಯಾಗುವ ಸಾಧ್ಯತೆಯಿರುತ್ತದೆ. ಪ್ರತಿಯೊಂದು ಅಭರಣಗಳನ್ನು ಪ್ರತ್ಯೇಕವಾಗಿರಿಸುವ ಅಭ್ಯಾಸ ಮಾಡಿಕೊಳ್ಳಿ. ಮೊದಲು ಇವುಗಳನ್ನು ನೀಟಾಗಿ ಒಂದು ಮೃದುವಾದ ಬಟ್ಟೆಯಲ್ಲಿಟ್ಟು ನಂತರ ಬಾಕ್ಸ್ನಲ್ಲಿಡುವುದು ಉತ್ತಮ.
ಬಂಗಾರದ ಆಭರಣಗಳ ನಿರ್ವಹಣೆ
ಬೆಲೆಬಾಳುವ ಆಭರಣಗಳನ್ನು ಕಬ್ಬಿಣ ಅಥವಾ ಸ್ಟೀಲ್ ಡಬ್ಬಿಗಳಲ್ಲಿ ಇರಿಸ ಬಾರದು. ಆಗಾಗ್ಗೆ ಪಾಲಿಷ್ ಮಾಡಿಸುವುದು ಬೇಡ. ಆಭರಣಗಳನ್ನು ಸ್ವಚ್ಛಗೊಳಿಸಲು ಆಸಿಡ್ ಬಳಸ ಬಾರದು. ಬಂಗಾರದ ಆಭರಣಗಳನ್ನು ಸುತ್ತಿಡಲು ಟಿಷ್ಯೂ ಪೇಪರ್ ಇಲ್ಲವೇ ಮೃದುವಾದ ವಸ್ತ್ರ ಬಳಸುವುದು ಉತ್ತಮ.
ಮುತ್ತಿನ ಆಭರಣಗಳ ಸೌಂದರ್ಯ
ಮುತ್ತಿನ ಆಭರಣಗಳನ್ನು ಸ್ವಚ್ಚಗೊಳಿಸುವಾಗ ನೀರಿನಲ್ಲಿ ನೆನಸಬೇಡಿ. ಅವುಗಳನ್ನು ಉಪಯೋಗಿಸಿ ತೆಗೆದಿಡುವಾಗ ಶುದ್ಧವಾದ ಹತ್ತಿಯಿಂದ ಮೃದುವಾಗಿ ಒರೆಸಿ. ಕೊಳೆ ಹೊರಟು ಹೋಗುತ್ತದೆ. ಮುತ್ತಿನ ಆಭರಣಗಳನ್ನು ಹತ್ತಿಯಲ್ಲಿ ಸುತ್ತಿಡಿ. ಬೆವರುವವರು ಹಾಕಿದಾಗ ಕಲೆಯುಂಟಾಗಬಹುದು.
ಹೊಳೆಯುವ ಬೆಳ್ಳಿ ಆಭರಣಗಳು
ಬೆಳ್ಳಿ ಆಭರಣಗಳನ್ನು ಸಾಬೂನಿನ ಪೌಡರ್ ಹಾಕಿದ ಬಿಸಿನೀರಿನಲ್ಲಿ ನೆನೆಸಿ ತೊಳೆಯಬಹುದು. ಅಂಟುವಾಳ ಕಾಯಿ, ಹುಣಸೇಹಣ್ಣುಗಳಿಂದಲೂ ಸ್ವಚ್ಛಗೊಳಿಸಬಹುದು. ಆಲೂಗೆಡ್ಡೆ ಬೇಯಿಸಿ ಕುದಿಸಿದ ನೀರಿನಲ್ಲಿ ಕೆಲ ಕಾಲ ಇರಿಸಿ ತೊಳೆಯಬಹುದು. ಹಳೆಯ ಟೂತ್ ಬ್ರಷ್ ಉಪಯೋಗಿಸಿ ಕೊಳೆ ತೆಗೆಯಬಹುದು.
ಜ್ಞಾನಜ್ಯೋತಿ ಬ್ಯೂಟಿ ಎಕ್ಸ್ಪರ್ಟ್
